آخر الأخبار
مقتطفات عمران برس
المؤتمر الشعبي يحذر من اضعاف الجبهة الداخلية ووحدة الصف تحت مسميات زائفة موالية للعدوان
عمران برس - صنعاء:
الجمعة, 09-ديسمبر-2011
عمران برس - بقلم/ أسرار برس : -
بقلم/ أسرار برس
خديجة الحاشدي ...

قلنا كيف تسبر يا شباب ثورة وقايدها "حميد"؟ قالوا: تحبـل حتى بكلـب.. طيب أما ذلحين نقول: مَن أحبلهـا يولدهـا.. ومن كان يندعي أبوه الثور يروينا كيف يبتـل.. ما ينفعكم اليوم البكاء من "المشترك" زي المعزية بعد شهرين وكأنكم مش عارفين إن ذنب الكلب من قصمته؛ وذي تسموهم قادة الثورة كلهم "حطب سالمة" ما يلصى منه عودي..!!

قلتو باتفعلوا زي تونس ومصر. قلنا: أوبهوا ، مش كل البـُرم لسيـس، وبطلوا ملاحق في الشوارع وراء بنت كرمان.. مَن تسمّع للدجاجة دخلته الكرس.. فلتوا أبوهم كلهم سرق وعملاء، ومحد يربط حماره جنب حمار المدبر يدبره من دبوره.. ما قنعتوا وقلتم: ما بش إلاّ ثورة، يرحل يعني يرحل.. لكن ذلحين الحاذق خرج من السوق عَطل.. والقبيلي ذي ما يرى بوجيه الرجال تمنى حذاها، زي أولاد الأحمر وعلي محسن.. قد هي انتخابات يعني انتخابات ما فيها صفاط، ولا كيني ميني، واللي مش عاجبه يقرّح راسه بالجدر..!!

عـزّت عليك الحدا يا حميد، فرحتلك بولد ميت، وذلحين مالك عندنا غير مرة لما يموت زوجها.. قد ثورتك طلعت مثل مكوى جمعة، لأنك ركنت على بنت كرمان وما دريت ما من صَيــاد لبن ولو خدشت.. وركنت على المشترك وآخرتها وطّلت من حيث الكنان.. قد هي صحبة عيال الويل ذي تجمعهم العصيد وتفرقهم الدية.. وكم يا ناس في بلدنا بس هدره ووجاهة على الفاضي، يتغدى زوم ويخرج يلخلخ.. لكن معليش يابو يمن لا تغرك بنات العيد ولا بهايم علاّن، وإذا جاك البلاء وأنت نايم قم له قايم، قدك داري أن صيــاد ما تدخل إلاّ راس الذليل..!

الله يرضى على عمتي "زبون" كل ما تشوف المسيرات تجلس تعلق: "البقبقة لش يا جده والبيض لعمران"، ويوم تبسر صورة علي محسن تتعوذ من الشيطان وتقول: "الجني جني حتى يوم العيد". ويوم نتحاكى عن عيال الأحمر تقول لي: لا تصدقي أبوهم، ما يجي من المشرق إلاّ ذي يحرق،، كل همهم يجروا زلط باسم المشيخة والقبايل من كل بلاد، وكلها لجيوبهم، وفوق البشم إرزم إرزم يابن الأحمر..!

مسكينة عمتي ، كيف لو دريت إنهم تمشيخوا حتى على البرلمان، وشلو وريثة أبوهم خمس مقاعد غير الوزارات والشركات والأراضي والوكالات والنفط وغيرها، وغير.. وعاد المطاوعة في "سهيل" عاملين منهم: لوما قرينة نطلت السماء.. هم وبس.. ومن شاهدك يا منيصير، قال ذنبي.. وبكم توقع لك يا تيس الاصلاح، قال كله بالميزان..

ياسين على ديمقراطية المطاوعة، أتحدى أبو المؤتمر يفعلوا زيهم ويخرجوا حريمهم مظاهرة للبرلمان يطالبن بحق أزواجهن بنكاح الرضيعات..! هؤلاء هم صناع الدولة المدنية.. قلنا لكم لو كل من جاء نجر ما ظل في أرض الله حجر.. فلتوا السلطة لهم يا مؤتمر وهم يرووكم الديمقراطية، وبلاش تزايدوا، محد يبيع خبزه على بنت الخبازة..!

تحمدوا الله على ديمقراطية الأخوان وبيت الأحمر، من يوم قرحوها ثورةما عاد بقي في البلد إرهابي ولا سارق ولا ولد سوق، كلهم صاروا ثوار، وعلى عينك يا جيفارا.. وكل من قتل وهو ينهب أو يخرب أو يقصف البيوت صار شهيد.. ويا مولى العسيب ما ينفعك عسيبك، مولى الدراهم سلبك حبيبك.. يعني ما عاد ينفع تقولوا إن الجندي ذي يقتل وهو يدافع عن العرض والمال "شهيد".. خلاص أفتوا بها مطاوعة الإصلاح: الثورة تجب ما قبلها من شرايع، وكلنا على دين عاق والديه حاكم قطر، وعلى سُنة أم الثوار الشيخة موزي.. ومن دخل ساحة التغيير فهو آمـن.. ثـــورة يا آنسي وزنداني تحلل القتل والنهب والتخريب ورقدة الحريم بالشوارع في "مزدلفة" أخوان الشياطين!

طاسة الثورة تبرع بلاد.. وذي تشتي تبترع يا بنات تجي لعند الطاسة... وكل بلاد ولها برعها، إلاّ بلادنا تبترع على طاسة "الجزيرة".. لا جعلش بقاء يا "توكل بنت كرمان" ويا "موزة بنت ناصر"، قد قالوها في الأمثال: أخس البقر خلمجن الماء..!

لكن والله محد يفجع شعبنا بشوية جهال من حق أبو الألف ريال ونفر رز ودبيخ، وقد قالها علي ولد زايد: ما بتلة إلاّ بقوة ولا تجارة إلاّ بقانون.. يعني محد يطلع الكرسي برفلة جهال يا شعب اليمن، ومن قالك "جني" قول له "عفري".. ترى والله من قارب الخوف يأمن.. ولا تغركم هدرة وصراخ قحطان وعيال الأحمر، ما مع المشنوق إلاّ لسانه..

من أول يوم قلنا لـ"حميد"" أين ساير يا مضحكة؟ قال: أتضحك على الناس.. قد الخبير يشتي يوقع له رئيس جمهورية بالبلطجة والصعلكة وعيال السوق.. لكن يا حسرته لما يموت، صام صام وفطر على لصامة: حكومة وفاق وطني وانتخابات.. وعلى عينك يابن الأحمر قد أبو أحمد عادُه على الكرسي مثل الجبل ما يهزه ريح..! قلنا لكم مليون مرة: هذا تيس، قلتوا ما بش إلاّ تحلبوه.. والحين يا "مشترك" صدقتوا أنه "تيس الضباط"، ولاّ عادكم عمياء تخضب مجنونة والصوراء تسمع..!

أضف تعليقاً على هذا الخبر
ارسل هذا الخبر
تعليق
إرسل الخبر
إطبع الخبر
RSS
التعليقات
علي القيفي (ضيف)
12-06-2013
صح الله لسانك امانه انه كلام مثل الرصاص ومن ما أعجبه يشرب من البحر

علي القيفي (ضيف)
12-06-2013
صح الله لسانك امانه انه كلام مثل الرصاص ومن ما أعجبه يشرب من البحر

جبران (ضيف)
18-01-2013
صح لسانك والله أن الزعيم أسد ورجل بمعنى الكلمه حافظ على رجاله ودولتة والباقي على الوطنين الحفاظ على الوحده يورنا شطارتهم

جبران (ضيف)
18-01-2013
صح لسانك والله أن الزعيم أسد ورجل بمعنى الكلمه حافظ على رجاله ودولتة والباقي على الوطنين الحفاظ على الوحده يورنا شطارتهم

مغرب عينه على وطنه (ضيف)
05-07-2012
يعطيك الففففففففففففففففففففففففف عا فيه على هذا المقا ل

محمدالقحمي (ضيف)
15-03-2012
عزة عليك امك

الاسلوب الراقي (ضيف)
10-03-2012
هبلى....ماتقدري تنتقدي باسلوب راقي وتبيني الخطاء


جميع حقوق النشر محفوظة 2008-2018 لـ(عمران برس)